Ég er að hugsa um að skella mér

Beðið eftir sjóvinu

Vor í Vaglaskógi

Ókum í Vaglaskóg í blíðunni í gær með vinnuhópinn.
Skógurinn er jafn flottur og fyrrum og þetta visnaða gulbrúna víkur fyrir því græna.

Footloose

Má ég kynna : Mr Footloose Tryggvason, svona líka glaðan eftir velheppnaða rokktónleika Sudden Weather Change og Reykjavíkur í Populus Tremula um síðustu helgi.

Hertar Sultarólar á Hjalteyri

Fórum á sýningu útá Hjalteyri í gær, en nokkrar listaspírur hafa fengið afnot af plássi í gömlu síldarverksmiðjunni þar, til að halda menningaruppákomur af ýmssu tagi.

Nú stendur yfir samsýningin Hertar Sultarólar. Ekki skal framtakið gagnrýnt, en við verk Haraldar Inga fór ég að hugsa um vísuna hans Páls :

Það er ekki þorsk að fá
í þessum firði.
En þurru landi eru þeir á
og einskis virði.

Georg Hollanders er með uppástungu af Græðgisbana.

En Helgi Þórsson virðist hafa vissa hugmynd um hvar herða skuli sultarólina.

Þegar ég leit gömlu bryggjurnar augum fannst mér nú samt að náttúran sjálf ætti besta kreppulistaverkið.

Ríkisstjórn Jóhönnu Haarde

Það sér ekki mun á kúk og skít. Það má vera að þetta lið sé allt af vilja gert. Það er bara spurning um hvaða vilji það er.
Þegar Steingrímur J er farinn að hljóma einsog Geir H fyrir síðustu jól og svo virðist sem hann hafi í staðinn látið sjálfstæðismenn fá gömlu ræðurnar sínar, þá má fara að spyrja sig til hvers er kosið ?
Ég held fast við þá skoðun mína að alþingismenn eru með öllu óþarfir. Eini maðurinn sem er nauðsynlegur í Alþingishúsinu er húsvörðurinn !

Rauðaþögn og Skýjaglópur

Tvö ljósmyndaverkefni eru í gangi hjá mér, sem bæði munu enda með sýningum.
Hið fyrra ber titilinn: "Rauðaþögn á ferð og flugi" og fyrsta sýning á því verkefninu fyrirhuguð á Kaffi Karólínu í apríl 2010.
Hér eru tvö sýnishorn tekin uppi á hálendinu, þó ekki í jeppautanvegaakstri.


Hitt verkefnið er mér einnig hugleikið. Það gæti heitið : "Skýjagláp/Skýjaglópur", meiningin er að þekja veggi Populus Tremula með myndum af skýjum, kanski það verði líka 2010.

Að fara burt

Þessi kunni jafnvel betur við hryðjuverkin

Hryðjuverkalaus gangur

Æ já nú er algjörlega búið að afmá öll ummerki um Hollensk hryðjuverk og dauðhreinsa þennan hluta svipugangnanna.

Þagnarangi á sýningu

Um liðna helgi tók ég þátt í samsýningu í Populus tremula með yfirskriftinni " Í réttri hæð " . Sjá hér .
Verkið mitt heitir í allri hógværð " Þagnarangi úr Brandenburgerkonsert númer 5 eftir Jóhann Sebastían Bach "

Næturlífið downtown Akureyri

Hér vantar mús

Hestar að nasla í leysingatjörn við Skútustaði.
Vopnfirskur snjótittlingur, sem ekki virðist hafa misst úr máltíð liðinn vetur.
Einhversstaðar er mús.
Hestur, mús, tittlingur.

Populus Trichocarpa

Í tilefni af því að ég var að koma Populus Trichocarpa síðunni minni í sitt rétta horf, er hér nýleg mynd af öspunum góðu, þolinmóðustu ljósmyndafyrirsætum sem nokkur áhugaljósmyndari getur óskað sér.
Hér eru aspirnar í garði nágrannans.

Hollensk hryðjuverk

Í febrúar varð mikill styr útaf graffitíkroti eftir Hollenskra-myndlistarnema-partí á ganginum sem við Jón kölluðum Svipugöngin. Nú er búið að mála yfir þetta og ryk fallið á styrinn.

Kristján & Pétur

Þessir tveir heiðurspiltar rötuðu fyrir símamyndavélarlinsu mína sama dag í síðustu viku.
Sælir nabbnar.

Fleygir fuglar í Vopnafirði

Þarna stóðu steikurnar á árhólmanum og ég plaffaði á þær með myndavélinni.

Hekla Karen á Hauksstöðum

Við Fróðný brugðum okkur austur á land um helgina. að heimsækja ömmubarnið, prinsessuna Heklu Karen, í sveitina á Hauksstöðum í Vesturárdal í Vopnafirði.

Hekla fór með okkur í fjárhúsin, sýndi okkur nýborin lömb

og hana Flekku, sem er uppáhaldsærin hennar.


Það var lesið og leikið.


Að lokum tók Hekla Karen mynd af ömmu og afa í veiðihúsinu í Vesturársdal.

Viðhengi

Nei, þetta er ekki ný afstæðiskenning, né heldur töfraformúla til að leiða VG-þursa á evrópusambandsbraut.
Þetta er viðhengi við Torfunesbryggju.

Sumarköttur

Það er sumardagurinn fyrsti og þessi vel aldi heimilisköttur úr nágrenninu gerði sig nokkuð heimakominn.

Skemmdarverk í Kjarnaskógi

Við frú Fróðný fórum í fyrstu gönguferð vorsins í Kjarnaskóg um helgina. Svosem ekki í frásögur færandi, nema hvað klósettið var "lokað vegna skemmdarverk", einsog stendur á velktum miða á hurðinni.
Seinna á göngunni þegar við blöstu þessar allt að því huggulegu raflínur með gamla laginu, varð mér hugsað til fyrirhugaðra skemmdarverka á svæðinu með gífurlegri stálmastra-svokallaðri -byggðalínu ( les raforkuflutningslínu fyrir álver ).
Skemmdarverk á klósetti, þó fyrirlitleg séu, eru hjóm eitt miðað við þau náttúruspjöll, sem sumir afglapar eru tilbúnir framkvæma svo einhverjir í útlöndum meiki mikinn monning.
Naturen det billige skidt.

Af hröfnum

Ég er alltaf að bíða eftir því að ná virkilega góðri mynd af hröfnum/hrafni.
En þeir eru voða mikið fyrir að vera að fljúga og svona og sitja ekki í pósum, þá er nú betra að ljósmynda tré.
En hér eru tvö sýnishorn af Strandgötuhröfnum.

Brotinn oddur af oflæti

Ég, tiltölulega med fulde fem, hef ákveðið að taka aftur til við ljósmyndabloggið.
Hef hent út nánast öllum póstum gömlum, skildi þó listapistlana eftir. Það vantar þó myndir við þá marga, en meinið var nefnilega að bloggspottið, hundspottið að tarna, þurrkaði burtu flestar myndir sem ég var búinn að setja inn. En nú fer þetta í gang aftur, hægt en örugglega, aðallega fyrir sjálfan mig, þó mun ég af hégómaskap segja frá því að ég er byrjaður aftur.

Á myndinni er afinn með Viktor Daða og Heklu Karen rétt fyrir páska.

Fuglaskoðun

Við Fróðný renndum fram í Eyjafjarðarsveitsveit á sunnudaginn í fuglaskoðun með börnin.
Þau þurftu mikið að klappa þagnarfuglunum og eftir miklar pælingar sagði Viktor : " Hey þetta er einsog tónlist ". Hann er bara fimm ára en fattaði djókinn, hefur reyndar séð nótnablöð hjá stóra hálfbróður sínum og er nógu skarpur til að tengja.


Viktor var mjög hugsi þegar við komum að spóunum hans Helga Kristnesgoða, en lét engin komment falla, svo fóru þau systkynin bara að tína krækiber.

Blogspot er verra en skoffín

Komst að því mér til hrellingar að flest allar myndir við færslur mínar hér á þessari síðu hafa verið þurrkaðar út, svo og allar myndirnar á Populus Trichocarpa síðunni minni.
Það er engin leið að finna út hvernig þetta hefur getað átt sér stað. Aðrar síður á Blottspottinu því arna eru bara í góðu lagi ( Populus Panodil hefur til að mynda ekki lent í svona árás ).
Það er sennilega full langsótt að kenna sjónlistarmafíunni um þetta, einsog var þó augljóst þegar ég var að reyna að koma listapistlunum mínum inn hér um árið.
En það er ekki gaman að þessu ef síðan fær ekki að vera í friði.
Verst að mér er farið að finnast þetta svo gaman að setja inn mynd og mynd algjörlega á eigin forsendum og ábyrgðarlaust.
Ég mun því leita leiða til að taka upp þráðinn seinna meir með eiginlegri heimasíðu.
Þangað til verða færslur hér strjálar.
Ég vil helst ekkert hafa með hundspottið Blogspot að gera meir.